زجلية لروح الفنان الشهيد محمد رافع

بجنون غنّي يا مجد بجنون = والصوت خلّي بـ شامنا رافع
واليوم يا عرس الكرامهِ كون = طل العريس محمد ال رافع
وفتّح يا قاسيون الشموخ عيون = قاضي إنت عن توأمك رافع
مرهون عزّك يا جبل مرهون = بدم الشهيد ال عنك مدافع
وحقو يا تاريخ العروبي صون = النقّاد نقدن نقد مش شافع
ويا بطل يا محمد إنت بتمون = عالشام في موقف إلك نافع
عمرك تركتو للقدر موهون = وكان الوطن وحدو إلك دافع
في سوريا عشت العمر مفتون = وعن ( باب حارتها ) العِدا دافع
وبيوم إستشهادك الميمون = عاكتافك بواب المجد رافع
====

ويا ( أسير الإنتقام ) بهالمقام = دورك تقنتو بإحتراف وإنسجام
ومن بعد ما كنت بخيالك عايشو = صفّيت بالواقع ( أسير الإنتقام )
====
( مواسم خطر ) مثّلتها برقه وحنان = وقلبك لِأمن الناس يا محمد نطر
واليوم فيك انفجر صمام الأمان = وصُرت موسم من ( مواسم هالخطر )
====
و(عائد لـِ حيفا ) كان بعيونك بريق = وحُبّها شعّل بِأحشائك حريق
ومن كتر ما حبّيت حيفا يا بطل = ( عائد لـِ حيفا ) اليوم عن حق وحقيق
====
عشت العمُر عالقدس في حرقه وضنا = وكنت الفلسطيني السوري الما انحنا
حتى بـ ( أنا يا قدس ) صحت بهالوجود = إنتِ ( أنا يا قدس ) والأقصى أنا
====
كنت الوفي كنت الأبي والمُستقيم = وفيك عاشت سوريا جوا الصميم
كنت ( الزعيم ) بكبُر نفس المؤمني = ورحت وكتب دمّك أنا هوي ( الزعيم )
====
مشّيت قارب حُبّك بعكس الرياح = وناديت بالأرهاب بيكفّي صياح
بمرقة غدر إيد المنون اجتاحتك = بالدم تاردّيت عنا ( الأجتياح )
====
قلبك ولا مرّه عاحُب الشام مال = بإيمان ظاهر بالصليب وبالهلال
غيرك تردد بالحسم بالمعركي = وإنتِ حسمت الأمر في ( حسم الرجال )
====
وفي ( باب حاره ) استشهد أبراهيم غاب = وعاباب سوريه محمد سبع غاب
وعابواب سوريه السبع صارو اليوم = ابراهيم ومحمد شهيدين البواب !
=====
عطيني يا شعري موهبي عطيني = وتاخلّد الأبطال خلّيني
رافع محمد رافع الأوطان = فوق السما يتعلقو زيني
مش بس كنت بموهبة فنان = كنت للمبدا الحلو طيني
يا شب في زهوة شبابو كان = كل عمري رح تبكيني
وسكين هاك المجرم السجّان = يلّي كفر في دينك وديني
بكرا بيخلقلو ألف سلطان = راسو يقص بالف سكيني
ويا شهيد الحق يا إنسان = ضل بدفى روحك مدفيني
ولا تقول بكرا بيغلُب النسيان = عاذاكره فيها بتكويني
ولا تخاف مهما تقلّبو الأزمان = بالقلب والوجدان رح بتضل
         عايش بطل سوري فلسطيني

ملاحظه , الكلام اللي بين قوسين أسماء مسلسلات من اعمال الشهيد محمد رافع

شاعر الزجل اللبناني: محمد حسن شريم شريم